台中拍婚紗Pre-wedding❤行程緊密的3日2夜Masalili @ 瑪莎文化創意婚紗館masalili

台中拍婚紗Pre-wedding❤❤行程緊密的3日2夜Masalili - 去前準備

因為我同D先生都冇咁多假期，所以整個台中拍婚紗PW trip只得3日時間～好趕急，好彩所有時間都配合得好好，最終順利完成！

去前準備：

我地join左Masalili嘅幸福1+1計劃(可以揀2個外景景點，仲可以攞返全部相唔洗另外加錢 )，由於台幣去到4算，個台中拍婚紗plan變相抵左，最終連埋男仔要另外加錢租2套西裝，同埋呢個台中拍婚紗plan淨係包一晚酒店，所以要自己俾一晚酒店錢，所有加埋為返Hkd11,000。
*因為呢個台中拍婚紗plan係優惠價，所以要俾左一萬蚊台幣訂金先，其他plan就唔洗俾訂金的！

**如果有姊妹都有興趣join佢地呢個plan，記得參加埋個集like活動，會額外有個好禮組合送！(我集左之後，額外有多6張相入相簿&送多個20吋相框)

另外就係去台中拍婚紗嘅機票啦，因為我地得3日時間，一定要早機去晚機返，去台中嘅航班唔多，只係得hk express有早機去晚機返，所以唯有揀佢，如果行程唔趕嘅b2b可以睇下中華or港龍 ，因為價錢都只係相差幾百蚊，我買嘅時候hk express其實冇特別做緊咩優惠，2個人連稅加埋大概$2100左右，當然之後我見hk express有做優惠時，都有㩒下個價錢黎睇(婆仔心態)，竟然加埋所有嘢仲貴過冇promotion嘅時候少少，所以建議大家要格價喔！

去前第一個接觸嘅就係Masalili嘅線上客服-Yvonne，我真係要大讚Yvonne ，因為第一次去影，真係有好多嘅大、小問題，佢都一一細心嘅解答我，而且佢地有wechat或line～好方便，我成日諗到有咩問題就即刻問，好快回覆，佢亦會事前幫我地約好晒試衫嘅時間、溝通嘅時間！
話說我見到Masalili之前嘅客戶作品有個大「囍」字嘅道具，一見到就即刻心心眼，一問之下先知係個台灣客人自己帶去，個道具半個人咁高，當然我冇可能係香港造一個帶過去，最後Yvonne知道我真係好鍾意，竟然幫我搵左間台中租借道具嘅資料俾我～仲要平、靚、正喔(稍後開篇blog介紹)，仲驚我唔識去，整埋個google map路線圖俾我，呢啲唔係人地應份為我做嘅嘢，佢卻主動為我去做，因此，Yvonne令我未去台中拍婚紗之前已經對Masalili大大加分！

除此以外，佢地會係去之前send e-mail+Sms提我地要攜帶物品嘅清單、注意事項、去到嘅交通指南、旅遊資訊～令人覺得好窩心呀！仲會有份台中拍婚紗攝影溝通單要係去之前填左先，填寫我地想要嘅攝影風格、想要嘅造型風格、想同攝影師講嘅說話，系未去台中拍婚紗之前就做足準備功夫！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

台中拍婚紗Pre-wedding❤❤Masalili的Day 1 - 揀衫&溝通篇（多字&小小注意事項）

一早8點鐘飛機去台中拍婚紗，去到大概9點半，一出去可以係機場嘅中華電信出返張無限上網電話卡，跟住就搭的士去「黎客商旅」，行程大概30分鐘，車錢大概NT$400⋯可以check in擺底行李先，不過佢地要3點先會交房俾我地，住宿係台中好出名嘅逢甲夜市商圈裡面，講明夜市，舖頭大多寫住下午4點先開。
*如果早機去，建議試衫、溝通都可以約早啲。

Yvonne幫我地約左下午2點男仔要去「風尚西服」揀左衫先，風尚同Masalili係2個唔同嘅地方黎，去到會有位禮服先生帶我地上樓上，然後俾本相簿我地揀款，揀啱款再拎俾D先生試，佢地度好size後，會直接將衫送去Masalili。
*個人認為款式好少，大多係黑、白、銀灰，而且相簿內有啲款已經冇左，建議如果新郎想要啲特別款式or顏色，都係自己帶過去，因為masalili係冇包男仔嘅衫，租男仔衫要自己俾NT$3800～2套(包西裝、恤衫、馬甲、領呔）。

搞惦D先生，到我就約左5點鐘揀衫，女仔揀衫會去返Masalili度揀，由黎客過去大概15～20分鐘，車錢大概NT$200～$250左右，我個plan包左5套衫(2套婚紗、3套禮服，其中一套禮服係升級禮服)，負責我嘅禮服小姐「小青」，會帶我地上樓上揀衫，好似其他b2b所講，地方好大、款都算幾多下，中間掛住有啲要加錢的，但佢地唔會sell你 ⋯原先仲擔心自己2個鐘都唔夠揀，去到真係花多眼亂，唔知點揀好，好在小青會俾好多意見我，例如邊啲場景襯咩款好，而佢都會揀定一啲覺得適合我嘅出黎，無限制你每次揀幾多件，揀出黎嘅全部都可以攞去試，試完唔啱，可以過返去再揀過再試！

揀好左2套婚紗、2套禮服，就要去另一邊揀升級嗰套禮服，嘩！升級嗰邊嘅台中拍婚紗D禮服同婚紗真係好靚好新淨！心心眼！除左揀左套禮服，俾啲婚紗吸引住，又自己加錢揀左套婚紗 ⋯最後成個揀衫過程唔洗2個鐘就搞惦晒!

接住就係同攝影師溝通！好緊張～～～因為到嗰刻先知邊個係我嘅攝影師，最後係Eason，佢個人好nice、笑容滿面，拎住我地一早填好嘅攝影溝通單，同我地傾想點影，我比較著重相嘅感覺，所以有時言語都唔知點表達俾攝影師知，好彩save左一大推相俾攝影師睇，想要嘅唔想要嘅通通俾佢睇，仲有一早影底晒所有道具，俾埋佢睇，見到eason好認真咁抄底晒所有嘢，本身我呢個台中拍婚紗嘅package係有set死景點嘅配搭，因為我揀左影pure garden，佢只可以配搭海邊or紅葉樹林，但其實呢2個台中拍婚紗外景我都唔太想去，但package set左亦無辦法，點知eason睇完我save嘅相後，竟然話另一個地點帶我去光之草原，聽完真係開心到暈！我仲唔好意思咁問佢package唔係set左嗎？咁樣會唔會唔得？Eason同我講冇問題！可以的！真係大派定心丸！
*如果需要訂氣球，記得要係呢個時候同攝影師提出！

最後就要同門市客服Carol溝通，佢會大概講解一下個台中拍婚紗plan包啲咩，同埋循例都會講解下有咩可以優惠價升級，不過佢唔會hard sell的～
*如果想係第3日揀相時，就拎返全數soft copy嘅話，記得要係呢個時候向門市客服主動提出先，並且要將一隻「全新未開封」嘅usb交俾佢呀！！！

搞惦晒之後，就可以返酒店休息，準備第2日嘅台中拍婚紗～～～不過由於Eason建議D先生可以有條短褲拍攝，所以我地就到左酒店附近嘅逢甲夜市逛逛，正如Eason所講，入面有好多平、靚、正款式，有需要嘅話，不妨到逢甲夜市行下！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

台中拍婚紗Pre-wedding❤❤Masalili的Day 2 - 雨天拍攝之100分嘅攝影團隊(多字&多圖)

一早起身天陰陰～好擔心！
我地約左9點就要去到Masalili化妝換衫，化妝師係要到呢一刻先會開估㗎～～～超開心我嘅造型化妝師係「Hana」，之前見過好多人稱讚佢嘅造型，首先佢會問我有冇咩造型想要或者有冇咩特別要求，我嘅要求只有唔好咁成熟就ok，其他嘅由Hana自由發揮！
佢好快手一個鐘頭就已經幫我set好頭&化好妝，我本身塊面係有雀斑的，佢都冇sell過我要加安瓶，個妝出到黎好貼&斑斑遮晒，另外我膊頭亦有紋身，如果有需要遮，同佢地講就ok，唔需要另外加錢的，仲遮得好好添！

同一時間，會有另外一個女仔幫D先生整下頭化少少妝遮遮啲黑眼圈，當然男仔一早就搞惦啦，呢個時候必須要讚下今日同我地出台中拍婚紗外景嘅攝影助理「柏宏」，佢趁住我仲化緊妝嘅時候，同D先生再試下啲衫，因為D先生除左租借嗰2套西裝外，亦會有2套便服，同佢襯下啲衫同啲景搭唔搭到。

而Eason就會係呢個時候幫我地分配道具，睇下邊啲道具需要帶出去外景拍攝，執定上車，柏宏亦會幫我地準備定水、飲品、食物，準備好就出發影外景啦，Eason除左係今日嘅攝影師，仲會擔當埋司機嘅角色～～～

台中拍婚紗第1站係Pure garden，去到原來係一間位於巷仔內嘅雜貨精品店，真係估唔到巷仔內可以影到咁正嘅相，呢個時候已經開始落起毛毛雨 ⋯

台中拍婚紗第2站去到光復新村，呢個地方好有feel，我好鍾意！

嚟到呢度要換第套2衫～話說Masalili係冇造型師跟出外景，如果需要就要另外加錢，之前見過好多b2b話唔需要加，所以我都冇另外加錢，換衫就要靠D先生幫下手⋯係度真係要強烈稱讚下我嘅攝影師Eason，連補妝&轉髮型都係佢～會唔會太強啦？！
搞惦晒之後，天公不造美～～～落大雨，我地只好等雨勢細少少，先繼續進行台中拍婚紗，等候期間，我地只得一把遮，佢地俾左我同D先生，Eason同柏宏係繼續淋住雨幫我地睇下係邊影好，接住嘅拍攝，Eason落住雨都瞓晒地幫我地影，嗰下真係好感動，本身因為天氣唔好sad到爆嘅心情即刻冇晒！